Hiar ka roi ka par ha ka jylla Meghalaya ba rit than ka surok kali

Ka Surok ka dei ka budlum Jong ka roi ka par kumjuh ha ka ioh ka kot ha kano kano ka jaka bad lada ka surok iaid Kali ka biag hangta ka don ka roi ka par (development) bad kumjuh ha ka ioh ka kot Jong kata ka jaka.

Ha ka jylla jongngi ka jylla Meghalaya ka dei ka jylla kaba long jaka lum bad them bad kaba eh shisha ban pynpoi surok khamtam sha ki shnong ba don shapoh Jong ka riat bad ka ram hynrei wat la katta ruh ki don ki shnong kiba biang ki nongialam kiba lah ban pyniaidei ia ki nongmihkhmat ki lah ban pynpoi ia ka surok.

Ki don pat ki shnong kiba la palat ia ka spah snem ruh hynrei haba ym don ki nongialam shnong kiba lah ban pyniadei lane ba pyndem ia ki nongmihkhmat um don lad ban ym don surok satia ia ki wat la dei ki shnog heh.

To ngin nym ia kren ia kita ki bym pat don surok hynrei ngin phai shwa sha ki jaka ba kham kongsan ha ka jylla jogngi namar kat haduh kine ki sngi ka jing bym biang ka surok ka ktah shisha ia ka iaid ka ieng ka kam ka jam ka khaii ka pateng bad ka roi ka par khamtam ha ki jaka sor.

Haba phai sha sor Shillong ngin shem ba ka jingrit ka surok ka la pynhiar ia ka rukom long rukom man ki kam ki jam ki paidbah bad shisien ba ka la ktah kamut ka jingdkoh bad jingsuki ha ka rukom treikam ka don kaba mut shisien ba ka long kumta ka jylla jongngi baroh kawei ka ktah bad ka hiar shapoh.

Haba phai sha ka Sor Mawkyrwat ka nongbah ka South West Khasi Hill district bad hangne ngin shem ka surok na nongbah shillong sha kane ka jaka kaba la isynei bad ka bym iahap shuh kat kum ka kyrdan district.

Ka jingrit ka surok na Umiam sha Shillong ruh kaba lah ktah ia ka roi ka par ka jylla baroh kawei, ka jingrit ka surok na Jaintia kaba dei ka National Highway ba pyniasoh bad kiwei ki jylla kum ka Mizoram, Manipur bad Agartala bad ruh ka jingrit ka surok na Mylliem haduh Sor Shillong ka lah khate shibun ia ka por u paidbah bad haba Shah khate ha ka por kamut ka jingsuki ha ka roi ka par ka bym lah shuh ban ia kren ne iatai.

Ka jinhsahkut blok kaba man ka sngi bad man ka kynta haba leit sha sorShillong ne teng teng wat ban mih na sor Shillong kampher na kano kano la surok ka long kaba sohsat bha namar ka jingrit khlem akor ki surok kali kaba ktah ruh wat ia ki ba pang ba shitom.

Lyngba kane ka jing thoh Shu kwah ban pynpaw ba haduh katno kata ka jingktah lane ka jing sepei ka por haba rung bad mih ban leit sha nongbah sor Shillong namar ka rit than ka surok kumjuh ka jingsniew Jong ki surok sha ki jaka kiba paw ha ka ri India bad ka Pyrthei baroh kawei. 

Ka Surok Mawkyrwat ka long kaba sniew bah ka bym iahap shuh bad ka kyrdan district, ka jingsniew bad rit ka surok sha Mawsynram kaba dei ka shnong kaba paw ha ka pythei baroh kawei kumjuh ka Sohra ruh kaba dei ka ka jaka jngohkai ba paw ha pyrthei ruh ka don ia ka surok kaba sniew bad kaba bun na ki kali ruh ki pyrkhat arsien ha kaba iadei ban leit sha katei ka jaka na ka daw ba sniew palat ka surok.

Dei namar kata ka jing rit bad sniew ka surok ka dei ka daw bah ka jingdkoh ha ka roi ka par kumjuh ha ka ioh ka kot ha ka jylla baroh kawei kaba pynlong ruh ia ka jingkiew ha ka kyrduh kam kyrduh jam na ka daw ka surok kaba ngi tip kum ka budlum ha ki liang baroh Jong ka roi ka par.