Ka Sorkar ka dei ban khang ia ki iakop rwai bad shad ba pyniaid Vote da kaba Shu die Coupon.

Don shibun bha ki rynsan iakop rwai bad shad kiba pynlong bad pyniaid da ki kynhun bapher bapher jong ka jylla bad ki thaiñ bapher bapher bad ban bud lem ruh kumba ju pyniaid ha kiwei pat ki jaka da kaba pyn ap da ka song Pisa kaba heh ia ki nongjop la ha ka rwai ka shad ne ha kiwei pat ki sap ki phong.

Ha ka jylla jongngi don shibun bha ki riew donsap donnam ba don ha la ka sap ka sap la ha ka rwai ka tem ne ha ka pynkhih met pynkhih syngkai bad shibun bha ruh ki briew kiba ju ieid ban peitkai haba don kum kitei ki leh rong leh biria ne ki iakop ha rynsan katba lahduh ha la ka jingtbit bad ka jingnang ban pyniapmat ia u paidbah ruh.

Hapoh ka jylla jongngi don shibun ki riew donsap ha la ki sap ki phong ha ka shad ne rwai hynrei katba ban mih shabar na la ka jylla ki dang Duna haduh katta katta bad ia ka lynti iaid ruh Duna bha ki briew ki ba ju btin lynti sha kane ka thup. Shuh shuh shabar ka jylla ynda haba don ka iakop ruh ki jong ngi ki Duna bha ha ka jingbit jingbiang kumba la i bit ban rung ha ki jylli iakop ba kham heh hapoh ka ri.

Haba phai biang sha ka iakop Rwai bad shad ha kane ka jylla jongngi ka long ka bym lah satia ban pdiang namar ka jingbym biang ha ka rukom pyniaid kaba la jia lah bun snem bad kane ka rukom pyniaid ruh kaba ktah ia ki riew donsap ba shisha. Ban poi sha ka thong kumjuh ban ioh ka nam jop ha kane ka kynti ka long kaba eh bha wat Lada ngi la tbit haduh katta katta namar ha kaba khatduh ngi donkam hi ka Pisa.

Ha ki iakop Rwai lane ki iakop shad kiba heh ha ka jylla jong ngi Ittynad shisha kata ka rukom pynbit pynbiang hynrei kaba sangsot pat ka dei ba kiba lah iohrung shakhmat ki hap ban die ia ki coupon sha ki paidbah kum ka jing ioh vote ka jongki kamut ka vote Jong ki ka shong ha ka jinglah die ia ki coupons. Bad lada dei kiba duk ki hap ban tyrwa die bad lada dei kiba riewspah suk bha wat ban jop phainal ruh.

Shuh shuh la da ngi dei kiba wan na ka ing ba duk jynjar bha ban poi sha ka thong namar ba ngim don Pisa ban pynthame ban ioh ka nam ka burom. Ka rukom pyniaid ha ki rynsan iakop rwai bad shad hapoh ka jylla jongngi kampher la ha ka rynsan Jong ka jylla baroh kawei ne ka rynsan tang ha ki thaiñ ruh ka rukom pyniaid ka long kajuh kata ban pynrung sha ka kylla ba khatduh (Final) ki ju ia pynrung da ki 5 ngut haduh 8 ngut bad kine la Shu pynksan da ki nongbishar (judge) ba ym lah bishar shuh ba ki nongshim bynta ki hap ban Shu leh da kata ka voting. Kane ka voting ki hap ban tyrwa die  ka lah ban shongdor 5 tyngka ne 10 kawei ka vote. Kaba mut kiba kham lah die te kita hi kiban jop.

Lada ka Pisa voting ka leit sha ki nongjop ne nongshim bynta ngi sngewbha eh hynrei ka buit bad ka akor aiu ban hap ban die kumne ia ka vote bad lada ia uba riewspah kamut kine kiei kiei ki lah kut kita ki riew donsap ba shisha namar hakhmat ka Pisa. 

Lada long kaba lah ka sorkar la dei ban khang ia kum kine ki iakop shad ne rwai kiba ngam kwah satia ban pynpaw kyrteng hynrei ma phi kiba pule baroh phi la tip ba Kam ia hap dur bad ka sap ka phong ki riew donsap ban leh ha katei ka dur bad ka sorkar ka dei ban khang noh shisyndon namar ngim ju Shem ha ka jingiatip ban rung sha phainal haduh 8-10 hynrei dei tang ka buit ki nongpyniaid ban die vote lyngba kitei kiba rung phainal kiba khwan tang ha Pisa ym ban pynkhie sap.

Kyntang iawai ia ki riew donsap la ha ka shad ne rwai nga kyrpad ba kine kiei kiei Kim dei satia ki jaka ba pura ba phin kiew shajrong don shibun ki lad kiba phi lah ban paw kumjuh ban kamai ja kpoh na ka sap kaba phi don ym ba phin leit die voting sha surok shalynti synkien kaba pyni jaboh pynban bad pynhiar dor hi ruh ia ka sap ki riew donsap.