Ngi dawa ban Weng ia ki tnad shipai ha Shillong

Ha kiwei ki jaka ki shipai ki dei ki nong peit pyrman ia ka bha ka miat Jong ka imlang ka sah lang baroh kawei ban tem ban iada na ki jingkulmar kiba mih na ka imlang sahlang lane ia ki jingkulmar kiba wan na rud na kiar bad shibun ki Jing myntoi haba don ki nongiada nong ker nong da nong sumar ki ba ka sorkar ka buh na ka bynta ka shongsuk bad ka shongsaiñ.

Hynrei ha ka jylla jong ngi bad ka thaiñ lam mihngi baroh kawei Jong ka ri India ka dei ka jingtim iangi ki rit paid riewlum lada don ki Shipai kiba wanrah pynban ia ka umsnam kumjuh ka jingkulmar bad ban leh pyrshah ruh ia ka hukum Jong ka imlang sahlang bad ruh ki long ki mawjynthut kiba shyrkhei bha khamtam ha kane ka ri Khasi Jong ngi bad kiwei pat ki jaidbynriew ritpaid riewlum kiba don ha kane ka ri Mihngi jongngi.

Ka jingjia kaba la dep jia ha ka jylla Nagaland ka jingshah siat ki mynsiem ba lui lui ha ki shipai Jong ka ri India ka dei ka dak kum ka jingtim iangi lada ki shipai ki long jingeh ia ki ritpaid. Ka jingshah siat palat 10 ngut ki mynsiem ba lui lui khlem kano kano ka jingmaham lane khlem kano kano ka jingtip hynrei la Shu siat kumba siat blang bad masi ia ki.

Kaei ka ri India Jong ngi Kan leh ia kane ka kam bad haduh katno ka ibeiñ ia ka thaiñ lam mihngi Jong ka ri India naba kiba bun hi ki dei ki ritpaid riewlum. Bad ym tang ha Nagaland bad Meghalaya kumjuh kiwei kiwei ki jylla kum ka Manipur Mizoram Agartala kiba Shah ktah bha ha ki bor shipai na ka por sha ka por.

Haba ngi phai sha ka jylla lajong kaba ngi kham tip bha ka long ba ka jingdon ki shipai ka long mawjynthut ia ka ri u hynniewtrep baroh kawei ka jinglah ban iada ia ki mynderi shisngi ka dei ha kti kine ki shipai bad ka jingklun jaka na ka por sha ka por Jong ki shipai kaba wanrah jingeh ia ki paidbah. Ka jingkhapngiah Jong ka Sor Shillong ka dei naba don kine ki shipai poiei ki bym don kam donjam bad kiba ka jaidbynriew hi baroh kawei Kim donkam satia ia kine bad ka jingrit bad khapngiah ki surok ruh dei naba kurup jaka jubor ki shipai kaba jia naduh 7mer haduh Rilbong ter ter shaduh Civil Hospital bad ka jingthmu kamtrai ia u lum Shillong uba Ittynad bad shongkun ka jia bad ka jingkulmar ha ki thaiñ happy valley ka mih ruh na ka daw ki shipai hi.

Ngi sngew ba ka tnad shipai hapoh ka jylla jongngi ki dei ban mih mardor namar ki dei ki bym donkam donjam bad Shu pynkhapngiah pynban ia ka bri u hynniewtrep ba la Shu saktah ka leit ka wan.

Dei namar kata ko ki dkhot ka jaidbynriew baroh kawei to ngin ia ieng tylli ban dawa ba dei ban Weng noh shisyndon ia kine ki tnad shipai bym lerkam kiba long jingtim pynban ia ka jaidbynriew jongngi bad kiba wanrah jingeh bad jingjia ba sngewsih ha kane ka jylla khamtam ha ka khyndew ka shyiap ka bri u hynniewtrep baroh kawei.