Ka kamram ban iada jaidbynriew dei ki MDC bad lah siew ruh Da ka tulop ym kiba trei mon sngewbha

Baroh ngi tip bad ngi ioh sngew bha shaphang ki MDC lane ki Member District Council bad kaei ka thong pat kaba ka Sorkar ka buh ia kine bad kaei ka bynta ba ki dei ban Leh namar ha ka ri India baroh kawei ngin Shem tang 10 tylli ki Autonomous District council bad katto katne lyngba ka jinglong tynrai bad lyngba ka jingia thawaiñ.

Kiba bun hi ki dei ha ka thaiñ shatei lam mihngi kiba don haduh 10 tylli ki Autonomous District council bad ki dei ki jaka ba shong ba sah Da ki rit paid riew lum kiba ia shong ia sah Da ka rukom im ha ki dustur bad ka jinghiar pateng bapher bapher ka Jong ki hi. 

Lah pynkha ia ka Autonomous Council Da ka jingpynkupbor katkum ka khyrnit kaba 6 kaba kynthup ia ka article 244(2) bad 264(1) Jong ka riti synshar ka Ri India bad la kren Shai shaphang ka jinglong kyrpang ki jaidbynriew riewlum rit paid ba la kumno kumno Ruh donkam ban pynneh pynsah ia ki jaidbynriew riewlum ritpaid kiba don ha la ki jong ka kolshor bad ka rukom im.

Dei namar kata ha katei ka Khyrnit (6 Scheduled) lah pynpaw Shai ba ka dei kaba long kyrpang marwei Jong ki jaidbynriew riewlum ritpaid Da kaba phikir ba ki nongwei kin nym iohlad lane ia kaba ka Council ka ibit ki hap ban siew Da ka shalan ban ioh ia ka Licence katkum ka jingdonkam Jong ki la ha ka trei bylla sngi (labour) ne ha ka Khaii( trading) kin hap ban pynbiang ia ka por thik ban pyndep Ruh katkum ka por Lem kumta ka Bor Jong ka aiñ Kan leit wad ban pynshitom.

Shuh shuh ha katei ka Khyrnit lyngba ka Autonomous District council lah pynkupbor Ruh ha kaba iadei bad ka jaka puta ba ka Council ka hap ban sumar ia ki jaka puta ba Da leilei kin nym lah ban die lane ai Sha ki bym dei ki jaidbynriew ba don ha ka Council bad ka jingiada kyrpang ia ki khlaw ki btap ka lynti ka synkien, ban tuklar ia ka Kam Hima Sima dei ka Council khnang ba yn nym don kiba na bar ka jaidbynriew ban knieh lane kurup ei kumjuh wat ha ka shongkha shongman ka Council ka ju pyrkhing ia ka ioh tnga mynder bad shongkha khleh bad kiwei pat ki jaidbynriew.

Bad Ruh ban peit ia ka lum ka Wah kaba don ha u pud u sam kumjuh ban tuklar ia ka synshar khaddar ha ki shnong bad ki thaw lyngba ka jingpyrkhing ban ioh bynta ki Mynderi hapoh ka Dorbar. Kumjuh ka Council ka don ia ka Bor ban iada ban khynra ia ki kiwei ki jaidbynriew ba Leh donbor ha u pud u sam Jong ka bad ban pynshitom katkum ka aiñ ka District Council. Nalor kata ka Council ka dei ban nang pynkhlaiñ ia ka Bor synshar lyngba ki aiñ ka jongka Da kaba bang iai pynmih aiñ (legislate) ha ka Ing Dorbar Jong ka District council kaban Kham iada shuh shuh ia ka jaidbynriew la ha ka shongkha khleh, jaka ki puta, ka khaii ka pateng , ka bylla ka sngi, ka Kam synshar Hima synshar shnong, bad kiba bun ki Khep khnang ba kiwei pat ki jaidbynriew lane ki Mynderi Kim dei ban iohlad ha kane ka jaiddbynriew jongngi. Bad Ruh shibun ki Kam pynroi kiba ka Council ka dei ban wanrah lyngba ki Scheme bapher bapher kaba wanrah jingmyntoi ia la u paid u Hajar.

Mynta ngi lah sngewthuh kaei ka Kam Jong ka District council bad balei ba don ki MDC bad Kaei ka Bor kaba ki don lane ba kin hap ban leh khnang ba ka Jaidbynriew Jong ngi Kan neh ka sah lane Kan im suk im saiñ ha la ka Jong ka shyiap.

La ka dei ha ka District council Jong ki Garo, Khasi ne Jaintia ki don la ka Jong u pud u sam bad ka jingpynkupbor ban iada kyrpad iala ka Jong ka jaidbynriew kaba ngin peit Kam don shuh pat ka jingtrei na ka bynta ka jaidbynriew lajong kiba bun hi ki MDC Ruh Kim ju kren Dorbar ha kaba iadei bad ka jaidbynriew lajong bad kaba ktah eh ka long ia ka tnad labour bad trading kaba ki bar jylla ki iaidlait bad Kim don staia ia ka licence kumjuh ka District council Kam ju leit khynra. Ka jingdie jaka tuh Jong ki Khasi ka District council Kam lah ban Leh eiei ha Sor Shillong kiba bun ki paki dulan mynta ki dei Jong ki Poi ei bad kumjuh ki karkhana baheh baheh ki dei Jong ki poi-ei bad kaba Kham sngewsih naduh ba ioh Bor synshar thymmai naduh u 2019 ym pat don kawei Ruh ka aiñ lane ka bill kaba ka KHADC, JHADC ne GHADC Kan wanrah lane leit phah Sain ha u Governor kaba dei ka aiñ iada jaidbynriew. Pynban ngin Shem tang kaba rim Ruh kaba lah pynphai na u Governor Ruh Kim pat lah ban Amend lane kita ki Legal Adviser kiba dei ki Advocate ka District imat kiba Shu pass peit tuh imat kaba shimpor ia ki ban amend ia ki bill ba sah teng Da ki snem.

Ki bill ba sah teng Ruh ki dei tang na ka KHADC kaba Kham trei borbah khyndiat ban nujor bad kiwei ki District council kaba khatduh eh ha u 2018 kiba lah phah Sha u Governor Kum ka KSCL Bill, Clan Bill, Land Bill, bad kiwei kiwei kiba haduh mynta kane ka Lakam ba thymmai Kam lah khie khlieh bad Shu bam ei tang ka tulop ban ia pynbha pynkhlaiñ lane pynbeit ia ka barim Kim lah satia yn nai ia Kren ban ia thaw thymmai leilei haba bun ka ia peit mat dong bad ia knieh shuki.

Mynta ngi hap ban sngewthuh Shai ba ka kumno kumno ban iada hi iala ka jaidbynriew ka la don lupa hynrei kita kiba trei na ka bynta ka jaidbynriew lyngba ka tulop Kim lah kamut kine lei ba Shu shah jingit ba trei mon sngewbha kin nym lah satia lano Kano Ruh. Dei namar kata Lada ngi ieid jaidbynriew ngi hap pynbor bad ban pynwit ia ka thiah ka dem ki MDC ym shuh ia ki MLA.