Pyllut kai ia ka Pisa paidbah sha ki jaka sumar shimet

Ka sorkar jylla ha ka jingialam jong ka MDA ka sorkar synrop khaw lang ka la leh shibun ia ki jingsynniang ia ka imlang sahlang wat ia ki kam shimet ka la kloi ban synniang ngim tip bad ngim sngewthuh na kaei ka daw jong ka jingmyntoi jong u paidbah ne jongno.

Hynrei ha kine ki sngi ngi iohi ba ka sorkar jylla lyngba u Myntri Rangbah u la leit ban pyndonkam ia ka Meghalaya Health and Advancement Policy sha ki jaka sumar shimet mar 2 klur tyngka kiba lehse ki la dei lypa ki jaka sumar kiba ki trai katei ka jaka sumar ki la ioh nong lypa na u paidbah. Namar haba ngi leit sumar ha ki Hospital shimet ngi hap siew ha ka dor kaba heh te kumta ym lah lait ba ka jingioh nong kan don biet ruh kiba ioh nong palat ia  kata.

Ka jingkylli ka long balei pat ka sorkar kam lah ban pynbiang tang ia ki dawai lane ki Test ba pura hapoh Civil Hospital ha man la ki District kumjuh ia ka Ganesh Das Hospital kaba don ha  Lawmali kaba dei ka jaka sumar ia ki longkmie. Balei ka sorkar kam pylut ia katei ka Meghalaya Health and Advancement Policy  fund ha kitei ki jaka sumar jong u paidbah lehse lada long kumta ka jingkyrkhu ia u duk u suk.

Ha jaka sumar paidbah jong ka sorkar ngim shem kam da biang eh ki test kiba kham pynsted ia ka rukom treikam kumjuh ki Doctor bad ki nurse pynban kin kham biang ha ki hospital shimet bad ruh ka rukom pyniaid. bad ngi sngewthuh ba lada ka sorkar ka don ka mon ym don jingeh ban pynbiang ia ki jingdonkam ha ki jaka sumar sorkar kan long shisha ka jingmyntoi ym tang ia u piadbah hynrei ia ka sorkar ruh.

Ngi sngew donbok ba ngi don ka MHIS card bad mynta sa ka Ayushman Bharat card kaba trei ha baroh kawei ka ri India kumjuh ba katei ka Ayushman bharat card nalor ka 5 lakh ka ai ruh ia ka jingiohnong ki nongpang kynthup ruh bad ka OPD kaba 30000 tyngka wat la ki nongsumar ki leit sha ki jaka sumar shimet.

Lem kumta nga tharai kan long ka jingeh lada ym nang ban pyndonkma ia ka pisa u paidbah namar kum ka jingsngewthuh hi ka long ba ka pisa u paidbah dei beit ban pynlut ha ki jaka paidbah ne jaka sumar paidbah. Ym palat ia kata namar ki jaka sumar shimet hi ki dei kiba rem bad kiba ioh nong tang shimet.

Lada pynlut katta klur sha ki jaka sumar shimet balei kito ki PHC kiba dang don sha ki nongkyndong ki bym don wat ia ki doctor ruh, teng teng ka PHC ka khang tala bad kam long 24/7. shuh ka Emergency ruh kam don. Lada lah ban pynbiang shwa na kine ki barit ka jylla jong ngi kan long shisha kaba phuh kaba phieng haduh katta katta.