Ki tnad treikam sorkar lah mih 1 tarik lah ioh tulop, nonghikai skul pat?

Lada ngin iakren tang hapoh ka jylla lajong kata ha jylla Meghalaya ba baroh ki tnad treikam Jong ka sorkar ka ju pynpoi ia ki tulop Jong ki nongtrei ha ka por kaba biang khlem ju pep kata mar ia kut u bnai ha ka sngi nyngkong ne ka 1 tarik ubnai ban wan ka tulop ka la rung hapoh ka Bank Account ne kum ha ki por mynshwa ngi la lah ban leit sei tulop mar ia mih u bnai thymmai.

Ngim lah ban len ba baroh hi ki tnad treikam sorkar ki ju pynbiang ia ki tulop Jong ki nongtrei thik pa thik kumba la batai haneng bad lada ka slem ruh Kan shimpor tang da ki taiew lane ki sngi.

Sngewtynnad shibun haba ka bainong kaba ngi ioh na ka kam kaba ngi trei ka poi biang por bad biang sngi bad ka long kaba suk shibun lada ka tulop ka poi ha ka por kaba biang bad don ruh ka jingsngewtynnad haba bteng ban trei ia ka kam haba ka jingsiew ka poi biang por.

Sngewsih ban ong pat ba nalor ki tnad treikam sorkar ka don tang kawei ka tnad kaba na ka liang ka sorkar ka dang ieh khunrei ka dang ieh khunswet shadien wat la ki dei kiba trei ia ka burom Jong ka jylla bad ka jaidbynriew hi baroh kawei.

Ka tnad pule puthi ka dei kawei na ki tnad ba kongsan eh ha kano kano ka jaka bad ha Shi tyllup ka pyrthei ba hashwa ba ngin mih na ing ruh haba ngi don ka jingnang jingstad ngi don ka lynti ban iaid ban ieng na ka bynta ban tei ia ka pyrkhat pyrdaiñ ka kam ka jam bad ka roi ka par.

Hynrei ha ka jylla jongngi ki nonghikai skul kiba hap hapoh ka Deficit Salary bad SSA salary ka long kaba isynei haduh katta katta namar kum ka tnad treikam kaba hakhmat duh ha kano kano ka liang ruh phewse ia ka tulop ym don ba ai ha ki biang bnai lane ha ka shisien shibnai bad bunsien ia ka tulop ruh la Shu lait da ka said namar ka jingmih sha surok ka jingdawa don burom bad ka jing ia Shah thngan ka jia tang ban ioh la ka bainong ban dup ioh bam ja.

Ia ki nonghikai ha ka jylla Meghalaya ki bun kiba ju mad na ka por sha ka por ia ka jingeh ba Kin hap ruh ban Shu ia mih surok beit man ka por tang na ka bynta ka hok lajong. Ki nonghikai Deficits kumba 2 bnai haduh 3 bnai ki ju Shah shet tulop man ka por bad ki nonghikai SSA na ka ar bnai sha ka San bad hynriew bnai ka tulop ki Shah set ba katta ruh ka lait Noh haba don ka jingiakhih paidbah bad Jin da ki Shu ia sngap imat katno bnai bad snem ka sorkar Kan pyllait ia ka tulop Jong kitei ki nonghikai.

Ka long kaba sngewlehrain namar ha kiwei ki jaka ka jing burom ia ki nonghikai ka long haduh katta namar dei ma ki ba wanrah ka jingkylla ha ka dur ka jingnang jingstad bad dei ma ki ba ialam sha ka lynti kaba dei bad kaba janai na ka bynta ka kawei Jong ki khynnah pule. Hynrei ha ka jylla jongngi ka sorkar ka da kheiñ bad niew poh haduh katta bad ym lehraiñ ba ki nonghikai lade kin ia mih surok man ka por ban ia dawa bad pynpaw ia ka jing bymioh bad slem ka tulop.

Namar kata kum ka jaidbynriew ngi hap ban tip bad ban sngewthuh ba ha shwa ka jingjied ia kano kano ka Party, nongmihkhmat ka jingia kular (manifesto) ha kaba ia dei bad kane ka kam Kan dei ban don khnang ba Kan nym jia shuh lane kita kiba dei ki nongmihkhmat ki dei ban shimkhia ia kane ka mat kaba la ktah mynta ha ka jylla jong ngi la da ki phew snem.